ភ្នំពេញ៖ ប្រធានក្រុមប្រឹក្សាផ្ទាល់ព្រះមហាក្សត្រសម្ដេចតេជោ ហ៊ុន សែន បានថ្លែងលាជាចុងក្រោយនៅវិមានសភាបន្ទាប់ពីសម្ដេចនឹងបន្តតំណែងថ្មីនៅព្រឹទ្ធសភា។ នៅក្នុងការថ្លែងការរយៈពេលប្រមាណ ២០នាទីសម្តេចតេជោបានលើកឡើងថា ជីវិតរបស់សម្ដេចមានតែព្រះឥន្ទមួយគត់ដែលជាអ្នកកំណត់។
ថ្លែងសារលាសមាជិកសភានៅក្នុងសម័យប្រជុំពេញអង្គសភាព្រឹកថ្ងៃទី១ ខែមេសា សម្ដេចតេជោ ហ៊ុន សែន បានថ្លែងអំណរគុណទៅដល់សមាជិកសភាទាំងអស់តាំងពីការកកើតឡើងនៃសភាជាលើកដំបូងនៅឆ្នាំ១៩៨១ រហូតមកដល់ពេលបច្ចុប្បន្នដែលតែងតែគាំទ្រដល់គោលនយោបាយរបស់សម្ដេចជានិច្ច។ សម្ដេចបានបន្តថារហូតមកដល់ពេលនេះសម្ដេចបានកាន់តំណែងជាសមាជិកសភាអស់រយៈពេលជិតពាក់កណ្ដាលសតវត្សទៅហើយ។
ក្នុងការថ្លែងនោះ ដោយទំនងសំដៅទៅដល់វាសនារបស់សម្ដេច អតីតនាយករដ្ឋមន្ត្រីដែលនៅតែមានឥទ្ធិពលសម្ដេចតេជោបានបញ្ជាក់ថាមានតែព្រះឥន្ទមួយគត់ជាអ្នកកំណត់ទៅលើជីវិតរបស់សម្ដេច។
សម្ដេចថា៖ «មានតែព្រះឥន្ទមួយគត់ដែលមានសិទ្ធិអាកាត់ជីវិតរបស់ខ្ញុំដល់ពេលណា។ យមរាជគ្មានសិទ្ធិទេ»។
គួរឱ្យដឹងផងដែរថាសម្ដេចតេជោ ហ៊ុន សែន បានកាន់តំណែងជាសមាជិកសភាជាលើកដំបូងនៅក្នុងខែមិថុនា ឆ្នាំ១៩៨១ ដល់ខែឧសភា ឆ្នាំ១៩៩៣ និងបន្តដំណែងនៅក្នុងព្រះរាជាណាចក្រកម្ពុជាទី២ ពីថ្ងៃទី១៤ ខែមិថុនា ឆ្នាំ១៩៩៣ រហូតដល់ថ្ងៃទី២ ខែមេសា ឆ្នាំ២០២៤ សរុបមានចំនួន៤៣ឆ្នាំ៕
